About Mankitation

我諗唔明

今日講一個戇居的故事。我由細到大都冇目標，身邊朋友做乜我就跟住做，讀書揀科到出嚟做嘢，一直隨波逐流。

我討厭讀書，從來冇專心上過堂。記得畢業嗰年就係sARS嗰年，週圍都揾唔到嘢做，又唔想再讀書，幾個friend一齊傾不如做電喇，起碼屋企有嘢壞都識得整。於是入行做超齡學徒，一做做咗16年，仲讀咗10年夜校，我諗唔明。

直到有日幫媽咪執屋，見到佢有一個女皇頭coin art，竟然係老豆親手整。老豆表面係一個運輸佬，相處過其實鐵漢柔情，但點都諗唔到佢會做到coin art，同我今日一樣，我諗唔明。

有一件事我好深刻，啱啱學師，車羅刨磨電石火花，我最憎鋸嘢，做學徒有一堂，任務好簡單，只是將一條圓形似午餐肉咁厚的鐵，用手鋸開4嚿，4刀鋸完便可以放學，有8個鐘頭俾大家鋸。聽落勁簡單，最後我要請槍先可以放學。我當時見到有個同學仔好鍾意鋸嘢，完全諗唔明，我當時極討厭鋸嘢，依家做到鋸不離手，我諗唔明。

直到今年，公司叫我打一枝我諗唔明的針。我冇再諗喇，收拾細軟，帶住我的鋸，去一個叫宇宙的地方，做我想做的事。

朋友擔心我，同事勸我，屋企人幫我驚，老豆笑我手作仔，最後同米米傾完：

我：「我咁做你驚唔驚ar?」
米：「驚咩ar?」
我：「可能冇飯開架！」
米：「我煮麵你食囉！！」

雖然講笑咁講
但我當真架喇

同年六月
Workshop成立

最後發現，我曾經最討厭的事，用各種形式，變成我的助力。

我唔知呢條路可以行幾耐，但我希望可以做到做唔到為止。

多謝大家睇完